نحمد اللي مثبتِ فينا العقول=والعقل نعمه وربي نشكره
كل عاقل مسؤل مافيها جدول=وكل رب أسره يحصد مابذره
لعنبو وقتِ به الدنيا ميول=ياحيات الذل شفنا المسخره
المظاهر والرفاهه والفضول=في شباب اليوم تزرع بصغره
والجهل له دور بقلوب الخبول=ميتِ قلبه وعينه مبصره
لحيه وشارب وزند بعرض طول=جسم ثورِ داخله قلب ابقره
الرجل فيهم تمياع وخمول=لبس جنز وحالقِ نص اشعره
الله يكرمكم مايسو نعول=ما يعرف يده اليمين من ايسره
كل ليله لي لدانه بالطبول=وصوتهم مثل البلابل باشجره
وقلبوها رقص دسكو ليل مول=يقلدون الغرب غزو المكفره
وبكل موقع مشتبه تلقى الحثول=هستره في هستره في هستره
بالشوارع مثل مجنونِ يجول=ومعه شله كلبوهم مبزره
وفوق هذا مدمنِ شرب الكحول=ويتعاطى كل نوع يخدره
وعزي الأبنتِ تزوجها امهبول=لستكن منفوخ في وسط اكفره
تبغي يسعدها ويشتال الحمول=لاكن الحيوان لقاها اظهره
دايمِ في وجهها يصرخ زعول=ولا يعبرها ودايم يحقره
وسكرت في وجهها كل الحلول=تكسر الخاطر ولاحدن يجبره
وفتحو لبليس بيبان الدخول=وسوس الشيطان في عقل المره
وكشفة عن وجهها الغض الخجول=وسارت بدرب الظلام وبحفره
وكلها من سبته ضاعت لأحول=دمره ياجعل ربي يدمره
ومن حياته مل زهقان وملول=وصار يبحث عن طريقِ يعبره
والفريسه صار طعمِ لنغول=سهلِ أغوائه وسهل تجرجره
بالمياه العكره أتصاد العجول=شلة التكفير عقله تسحره
وبالبد ايه قد موله صحن فول=وخبزتِ كلها وسدة حنجره
عيش وملح وكل ماتطلب سهول=تطلب الف ريال نعطيك أعشره
وبرمجؤ مخه هل الفكر الضلول=قالو حنا أهل الوجيه المنوره
كان تبغي الخير وهمومك تزول=والذ نوب عنك إلاهي يغفره
وجنتِ فيها على كيفك تصول=وحور عين ونهر لذه باخمره
والشهاده له طريقِ للوصول=في سبيل الله اعمالك مثمره
ومع طريق الخير في وجهك قبول=عاهد اخوانك ومثلك مظفره
قس قلبك يابو القلب الصمول=وحارب الكفار ماشي تخسره
غرروبه وغسلو مخه غسول=اصغر امجاهد الله ما أكبره
البس احزام الشهاده لنزول=والله أكبر روحك عطر المقبره
فجر المبنى أطفال وكهول=لو ابوك وامك بوسطه فجره
ديننا وصى عليه أفضل رسول=والمعاهد في امانِ يستره
وش نقول وش نخلي وش نقول=في شباب اليوم راحوا بخبره
ويلهم لازلزلت ذيك السهول=والجبال اتحن ويذوب أحجره
في نهارِ يذهل العاقل ذهول=وكل كافر في جهنم يحشره
عند رب البيت أحسابه غلول=والعمل من خير او شرِ يره
ياشباب انتم ضحيه لسفول=وانتم للأ سلام أكبر مفخره
حاربو الارهاب ياعيال الزحول=والوطن روحك فداء لاتذخره

المشاركة الأصلية كتبت بواسطة مشعان لحيه وشارب وزند بعرض طول جسم ثورِ داخله قلب ابقره تحدثت عن واقع .. الله يعين الزمن على جيل اليوم صح لسانك ]

المشاركة الأصلية كتبت بواسطة ღالوفا طبعي ღ وش نقول وش نخلي وش نقول... في شباب اليوم راحوا بخبره ماجد بن مطر صح لسانك وسلم منطوقك وأبدل الكريم حال شبابنا سلمت قريحتك على هذه القصيدة الرائعه دمتَ بعطاء وبحفظ الكريم